هل تسمعني -١٨

آلو آلو..
هل تسمعني..
أنا بكلم سعادتك..
من فوق السطوح..
إيه يا فندم..
بتفرج علي إيه..
منظر إيه..
الغروب..
لأ يا فندم..
ده أنا بظبط الدش..
عشان بشوف الصورة
لمؤاخذة بالمقلوب..
لأ يا فندم..
أنا والأستاذ سيد..
ده جاري وحبيبي..
تصور سعادتك..
أول مرة أشوف مصر
من فوق السطوح..
جميلة سعادتك..
بس تحس إنها لسه..
ف مرحلة البث التجريبي..
يا ساتر..
يا ساتر يارب..
ملعون الدش..
ع التليفزيون..
ع الصورة..
لا يا فندم سعادتك متقلقش..
ده الأستاذ سيد..
والطبق..
والماسورة..
وقعوا من فوق السطوح..
إيه يا فندم
لأ ده إحنا ف الدور العاشر..
الدوام لله سعادتك..

هل تسمعني - ١٦

آلو آلو..
أيوه يا فندم..
أنا بكلم سعادتك من دمياط..
نفسي هفتني ع المشبك سعادتك..
وبالمرة نشوف جهاز البت جمالات..
عقبال أولادك..
دخلتها اتفشكلت يجي سبع مرات..
لأ يا فندم سوء تفاهم بسيط..
مين يا فندم..
أنا؟!
عروسة جديدة..
تاني..
ونرجع إيه سعادتك..
اللي فات..
هو ينفع يرجع؟!
شربات..
ورحمة أمي شربات..
طب ياريت سعادتك..
توطي صوتك شوية..
الحكومة جنبي سعادتك..
لأ يا فندم..
أنا قصدي مراتي..
أصل هي اللي معاها الميزانية..
والميه والسندوتشات..
إيه يا فندم..
مصانع إيه..
أسمدة..
غازات؟!
لامؤاخذة مش واخد بالي سعادتك..
بس عموماً..
إحنا طول عمرنا..
جدعان أوي مع الخواجات..
طب يا فندم..
عشان جمالات بتضرب العريس..
بسيطة ورحمة أمي..
يا نهار أسود..
ده الواد تقريباً مات..

وش القفص

علي فكره
احنا يادوب بس الشويه
اللي علي وش القفص
بدل وكرفتات
وكام شارع ومدارس لغات
اما القعر
لا دقن
ولا شنب
ولا شعر
ولا اوصاف
اطلع واتفرج يا معلم ع الاطراف
عندنا قري وشوارع وبيوت
كل دقيقه بتموت
لا ميه ولا نور
ولا حلم ولا رجل ولا لحاف
اتفرج يمكن تتخض
ولو لسه بتحس بجد
اكيد هاتخاف

هل تسمعني -١٥

آلو آلو..
أيوه سعادتك..
سامعني كده كويس..
صوتي!
زي الفل يافندم..
بس تقريبا م الخضة..
لسه محبوس..
أصلي حلمت إمبارح..
حلم حلو أوي..
بس زي ما يكون كابوس..
لأ خير سعادتك..
واحد طويل وعريض وكبير..
بقوله إنت مين..
قاللي أنا عذاب الضمير..
كتم نفسي..
وفضل يضغط ويدوس..
مع إني عمري..
ما أذيت حد ورحمة أمي..
ده أنا كل اللي بعمله..
إني بهدي النفوس..
حتي لما محفظتي اتسرقت..
قلت المهم الرقم القومي..
وف ستين داهية الفلوس..
لا يافندم..
أنا بنام ع الكنبة..
اللي ف أوضة الجلوس..
بطانية؟!
عندي سعادتك..
ماركة جبهالي من بره..
ابن خالتي..
الأستاذ محروس..
لا يافندم شقاوة إيه..
أنا؟!
معقول؟!
خلبوص؟!
لأ يافندم..
إنت مخ سعادتك..
راح لبعيد أوي..
قال شقاوة قال..

هل تسمعني - ١٤

آلو آلو..
هل تسمعني..
أيوه يا فندم..
أنا تقريبًا ف الهو..
بكلم سعادتك من ع الحدود..
مفيش هنا أي حاجة يا فندم..
بس الجودة برضة ف الموجود..
لا يا فندم..
المواطن هنا..
قماشة تانية خالص..
لا مدرسين ولا مدارس..
ولا أمل ولا وعود..
بس ابتسامة الرضا..
والسعادة كلها بقي..
عارف سعادتك الإحساس..
بأن الطريق مسدود..
أنا..
لا يا فندم أنا أعيش..
ف أي مكان..
أنا ابن ناس ومدلع..
سعادتك ما تعرفش..
إني آخر العنقود..
ماتشغلش بالك..
معايا ورحمة أمي..
يا فندم كفاية الجو الروحاني..
والقمر..
والصحرا..
يمكن أحتاج بس أجرة السكة..
لو فيه نصيب..
وهانعود..
طب يا فندم..
السلام أمانة بقي..

هل تسمعني 13

آلو آلو..
هل تسمعني ..
عارف بكلم سعادتك منين..
حزر فزر كده يافندم
لا يافندم فرن إيه ..
ورحمة أمي بكلمك م الأوبرا..
عرض روسي
أيوة سعادتك باليه
حلاوة وشقاوة ورشاقة ..
أقول ايه بس يافندم
ولاإيه..
أهي فسحة برضه سعادتك
أتفرج
وأحاول أفهم اللي أقدر عليه
لا يافندم معايا دعوة
الواد ابن اختي جدع أوي ..
ويعرف سيد بيه..
مشكلة صغيرة أوي يا فندم
سمحوا بدخول العيال..
وأنا والجماعة لأ
..
مش عارف..
طب يافندم..
أنا ف قسم قصر النيل
آه هو قصر النيل..

مش كده ياباشا..؟

هل تسمعني - ١١

آلو آلو
هل تسمعني
بكلم سعادتك
من غرب السكة الحديد
ناس تقول ده وجه قبلي
وناس تقول عليه الصعيد
لا يا فندم ده فركة كعب
بس لسه بعيد
المواطن؟!
علي حطت إيدك يا فندم
ورحمة أمي سكر
زي ما سيبته
ومفيش جديد
فيه سعادتك ضحكة حلوة بس ما اتخبطش لسه
ف واحد سعيد
أنا؟!
زي الفل
الواد ابني
نجح بتفوق سعادتك
حتة ملحق صغير ف الرياضة بس تقريبا ها يعيد
طب يا فندم
عشان بتكلم م السنترال
وسعر الدقيقة
كل شوية بيزيد
مستورة سعادتك والحمد لله

ميدان العتبة

لما أنا والسرير بنتخاصم..
لا يمكن أرتاح ع الكنبة..
ولا ع الكرسي ولا ع الأرض..
ولما يومي بيبتدي..
من ميدان العتبة..
بعرف أد إيه يا حبيبتي..
إحنا لسه بعاد عن بعض..
ولما العلاج يبقي كله مسكنات..
بتتساوي كل الأوجاع..
الصداع..
زي المرارة..
وسرطان..
زي نزلة البرد..
المهم..
يوم التلات اللي فات..
كان يوم حافل..
طول النهار بلف..
علي كالون ست تكات..
روحي ضايعة..
وقلبي قافل..
قالتلي بحبك..
قلتلها مش سامع..
قالتلي وحشتني..
قلتلها مش شايف..
قالتلي إنت سافل..
سكت ومشيت..
زي ما بتمشي كل المسائل..
تسرقني من تاني..
نفس الحاجات..
وكل ما حس بالألم..
أقول لقلبي تستاهل..
آد إيه يا حبيبتي عيونك..
جميلة أوي وصافية..
لكن ميدان العتبة..
ديما يفكرني..
إني لسه..
في العشق جاهل..

مصاريف المدرسة

البنت بنتي..
كل يوم تكبر سنين..
حلوين عينيها..
بس ليه..
مش فرحانين..
في السن ده..
وبتقول كلام..
ليه لما تصحي..
بكون بنام..
حاولت أقرب منها..
لاقتني مش عارف أنا..
أبقي مين..
وفتحت قلبي يقولها..
ملقيتش غير..
مصاريف المدرسة..
وفلوس المدرسين..

إيه الحلاوة دي

معلش اسمح لي..
لو هانتكلم عن الحلاوة..
أنا تقاطيعي مجرمة..
صحيح وداني كبيرة..
لكن مناخيري منمنمة..
وكل ما أطلع سلمة..
يقولولي شد حيلك..
لسه بدري ع السطوح..
عيوني جريئة..
جريئة..
لكن في الحقيقة..
لا بتعرف تداري..
ولا بتقدر تبوح..
شعري صحيح مش ناعم..
لكن لايق علي راسي..
ولما يصدق إحساسي..
معرفش فين من روحي أروح..
بحبك لما بتستعبط..
وتقوللي مالك..
بتبكي ليه..
ومن إيه كده قلبك مجروح..
يا عم روح..