السبت، 4 يوليو، 2015

عين الباب السحرية

ناس بعيد عنك لكن
ترتاح أوى لكلامهم
وناس لما تدق بابك
ترد.. يوووووووووه
ودول إيه بقى اللى جابهم
وناس
مطرح ما تمشى معاهم
تلاقى الدنيا أمان
من كتر الدفا اللى فيهم
ساعة ما ياخدوك بالحضن
ما تعرف إن كانوا هم أعز أصحابك
ولا إنت اللى أغلى أحبابهم

مساحة قلبى

انا بخير
و زي الفل و الريحان
و قلبي اللي كبر فجأة قبل الآوان
لا بيعجز
ولا بيشيخ
ولسه طفل
زي زمان
بطعم الفرح
وريحة الأرض ساعة المطر
ورغم إني ف قلب الخطر
انا حاسس
بأن الدنيا لسه امان
وإيه كمان ..
ولو قربت مني يا حزن
ولو فكرت تأذيني
منين ما بروح بلاقي حضن
قادر لسه يحميني ..
و اقلق ليه
وانا امي اللي كانت لما تدعيلي
تقولي روح ..
ربنا ما يحوجك لحد
تعيش حر .. كما العصفور
ولا يدخل في قلبك برد
واقلق ليه ..
ولو تقفلها ميه ونور
تبيع .. تخطف .. تشتري الدستور
ولو تكسر قلم واتنين
ولو تسرق رغيف العيش
ما عمرك يوم حتعرف فين
انا شايل اغاني العشق
ولو تفهم ف دمع العين
كنت عرفت ان الألم
ما يكسرنيش
ده بيقربني من روحي
تروح انت ..
و روحي تعيش ..
واقلق ليه ..
مفيش ف القلب غير غنوه
كلام بيرم وصوت درويش
وعمري ما اتوه
في وسط قلوب
بعرفها وعرفاني ..
و مهما تضيق ..
مساحة قلبي أد الكون
ما دام النسمة وصلاني ..
واقلق ليه ..
و انا الخطوة اللي وخداني
تقربني ..
ما تبعدنيش

نشرت فى المصرى اليوم بتاريخ 19 أكتوبر 2010
http://www.almasryalyoum.com/news/details/91623

السبت، 26 يناير، 2013

الصفحة الأخيرة

مش باقى من كل الرايات
غير راية الحزن
بنمشى ف الشارع ساعات
ما بنلاقيش حد
ناخده بالحضن
راح فين الشاطر حسن
يا ست الحسن؟
إوعى تقوليلى خلاص
ماعدش ف الشارع
لا ناس..
ولا بيوت
جايز يغيب الضى
لكن عمر القمر ما يموت
بصى تانى..
فى الصفحة الأخيرة
فوق ع اليمين
عنوان..
غير كل العناوين
فى الممنوع..
مجدى مهنا..
لحد آخر نفس
وحيرتك أمل
وخوفك ونس
وحلمك وطن
وبنى آدمين
أما عن أحوالنا يامجدى
فأنت سيد العارفين
لسه يامجدى
ليل القاهرة بايخ
ولسه ع المنابر مشايخ
بتدعى بطولة العمر
لأصحاب الدار
وتقول آمين
ولسه حكم البراءة
مكافأة اللصوص والمجرمين
ولسه عايزين ناكل عيش
ونربى العيال
لكن لا العيال بتكبر يامجدى
ولا إحنا كمان عايشين
عارف يامجدى..
أجمل ما فى الألم
كشف لنا عن
ضعفك الجميل
ودمعتك القريبة
وابتسامتك الرقيقة
بدرى أوى يامجدى
عرفت الحقيقة
وعشت العمر كله
ف كام دقيقة
زى أى فارس نبيل
وده قدرك يا طيبة
ياعروسة النيل
كل ما يروح حد م الحبايب
ينطفى جواكى قنديل
يعوض عليكى ربنا
عوض الصابرين

الأربعاء، 9 يناير، 2013

الأستاذ راضى ـ ١

أيوه يا فندم ..
أنا راضى ..
راضى سعادتك راضى ..
موجود يا فندم ..
ورحمة أمى ..
ف سيرتك على طول ..
وحياة ولادى ..
عارف إنك مشغول ..
ومش فاضى ..
كان الله ف العون ..
إيه يا فندم ..
الوضع !!
مش حلو أوى ..
بس هو ده العادى ..
المترو !!
شغال يا فندم ..
واهو ساعات يعطل ..
عند سعد زغلول ..
وساعات يريّح ف المعادى ..
كل سنة ومعاليك طيب
انت العيد ده معانا !!
ولا لسه ف بلاد بره ..
طب والنبى ..
ابقى اغلط مرة ..
وعدى اشرب الشاى ..
لا إله إلا الله ..
باى باى

النيل بيتحرق

كأننا فى القطب الشمالى..
والدنيا مغرب على طول..
يرد حالك على حالى..
أقول أنا..
ولا انت تقول..
عارف..
إحنا أكتر شعب ف الدنيا اتطعم
ومع ذلك كلنا مرضى..
معقول الأمل اللى إتولد إمبارح
مات النهارده..
استمتع بالفوضى..
كسر إزاز المدرسة المتكسر..
ضلم شارع..
طول عمره كان بيحلم ينور..
واقطع طريق..
وقولى..
لو النيل إتحرق..
مين راح يطفى الحريق

الاثنين، 7 يناير، 2013

الكلب ريكس


رأيك إيه يا مأمور الضرايب..
ف البيت اللى كان تمنه
فراق الحبايب..
معايا..
معاك..
طب تعالى ندخل بقى ف المفيد
الراجل ده عشان لقمة العيش
سافر بلاد بعيد.. بعيد
معايا..
معاك..
فات عليه كام هلال شوال
ووقفة ودخول مدارس وعيد..
معايا..
معاك..
يعنى اتغرب واتعذب
ورجع حط تحويشة العمر
ف حتة أرض
ف مجتمع عمرانى جديد..
معايا..
معاك.. 
ولإنها كانت صحرا
فالشارع كان عريض..
معايا..
معاك..
وعشان بيحب الجمال
وبيكره القبح
والإحساس البليد
معايا..
معاك..
زرع قدام البيت ورد بلدى
ولون الوجهة
واتحمل جشع تجار الأسمنت والحديد
معايا..
معاك..
ف الوقت اللى فيه قوانين
بتحميهم
وتسهيلات تديهم
وتطبطب عليهم
ولما تيجى تغرمهم
يادوب قيمة طابع بريد
ودلوقتى جاى تاخد منه
وسايب فلوسهم تزيد
معايا..
إيه ده إنت نمت
يارب لو قربت م البيت
الكلب ريكس يعضك..

مابتفرقش

عمليات جراحية..
تقدر بسهولة..
تغير ذمة.. وملة
وقلب.. ووش..
تكتب بقى..
ما تكتبش..
ما بتفرقش..
سوق بيلم غالى على رخيص
على واطى خسيس
م اللى ما بيساويش قرش..
بتكدب بقى.. ما بتكدبش
ما بتفرقش..
تبقى رقيق.. تبقى وسيم..
أو أعور ومكعور ولئيم..
تبقى بكرش.. من غير كرش
ما بتفرقش..
النور يقطع وانت بتحلق دقنك
ما تشفش تكمل.. عادى ما تكملش
واجه الدنيا بنص دقن وربع شنب
وما حدش راح ياخد باله
صدقنى..
بس انت دارى على شمعتك
واسكت.. وما تتكلمش
تبقى بتغنى تحت الدُش
وفجأة الميه مفيش
عيش.. عادى
أو نادى على مراتك
سمعت بقى.. ما سمعتش
ما بتفرقش..
واجه العالم واخرج بصابونك
ودور ع الفوطة بنفسك
وم الآخر.. تنشف جسمك.. تمشى مبلول
وما تنشفش..
ما بتفرقش..
تودى العيال المدرسة
تتعلم العيال.. ما تتعلمش
ما بتفرقش..
تروح المستشفى لا تلاقى طبيب ولا دوا..
اشكى أوجاعك لطوبة.. أو شجرة
أو للهوا..
أو لسواق الإسعاف النابطشى
وم الآخر.. تكشف.. ما تكشفش
ما بتفرقش..
المهم تموت على سريرك..
وما تتبهدلش..
ولازم يبقى عندك قناعة
إن الحزب الوطنى ما بيخسرش انتخابات
والأهلى ما بيتغلبش..
يعنى عملت بطاقة انتخابية
ولا أساساً مش مقتنع.. ما بتعملش
ما بتفرقش..
قمح مسوس بقى.. هوا متلوث
مركب بتخبط من غير ريس
نغرق..
نوصل بر أمان..
أو نصحى الصبح نلاقى النيل
بقى آخره.. أسوان..
لازم يبقى عندك إيمان
إن السلطة فى بلدنا إدمان
حاجة كده زى البيض العيون
لما يستقر فى الطاسة
ما بيتقلبش..

شوية حاجات

كل سنة وانت طيب
رمضان ع الأبواب..
هلت الروايح..
يا ترى ده عمر جاى
ولا ده عمر رايح..
المهم..
السنة دى هنصوم..
حسب البيان والمرسوم..
ولّا حد نظره حلو..
هيشوف الهلال..
عموماً..
أنا اشتريت أنبوبة بوتاجاز استبن..
وفوانيس صينى للعيال
ومراتى شاطرة مدبرة..
مخللة لمون وزتون..
وشايلة شوية حاجات ف شوال..
ودفعنا قسط المدرسة..
فاضل الكهرباء والصيانة والزبال..
شوف..
أول يومين نفطر ظفر..
ما هو كل سنة وانت طيب..
ده برضه احتفال..
ونكمل بعد كده بالفوازير..
والمسلسلات..
وأكيد الدورى العام شغال..
وتتقضى بإذن الله
وتبقى زى الفل
ويمشى الحال..
وأهو يوم نفطر عند حماتى
ويوم إحنا وحماتى
نفطر عند عمى كمال..
على فكرة بيتنا القديم
جاله قرار إزالة
تفتكر هايتزال..
يا عم ده جدك اللى بناه..
ولو كان خايب..
كان راح ف الزلزال..
إنما أنا عندى سؤال..
هو إحنا داخلين على رمضان..
ولا دى حرب وقتال..
ما هو لو العيش فى الفرن..
والزيت عند البقال..
والغاز مش زى ما سمعنا..
وتكتب واتقال..
والدروس الخصوصية جدعنة..
لله وللوطن..
واللحمة بريال..
كنا فكرنا ف حاجات أهم..
وعرفنا مصر راحت فين..
وارتاح البال..
لحسن بجد بجد..
غيابها طال..
كل سنة وانتم طيبين..

ما تاخدش فى بالك



الدنيا مش دايما طيبة..
وتعمل إيه
يا اللى انت دموعك قريبة..
ويا ترى دى ميزة
وللا ده عيب
تمد إيدك ف جيب القميص..
تطلع الورقة اللى فيها
اسم الدوا..
الرطوبة عالية
شربت كتير
لكن قلبى عمره ما ارتوى..
كام أجزخانة..
والإجابة
نفس الإجابة
مفيش
الدوا ده ناقص
يمكن ييجى كمان شهر
وجايز مايجيش خالص
اسأل قدام
انت عارف الدوا ده بكام
سألت ودورت ولفيت..
تعبت..
ولاقيتنى قريب من هنا
قلت أعدى
بس ياريتنى ما عديت..
شفتك..
حد شبه صاحبى
لكن مش هو
التانى كان أصغر منك بكتير..
وأجمل منك بكتير..
شربت قهوة وميه وعصير
بطعم الحيرة اللى ف شارع
القصر العينى
وتعب عسكرى واقف خدمة
ف عز حر أغسطس
ف قلب ميدان التحرير
ونزلت أدور من تانى
عن صاحبى اللى بجد..
واسأل ع الدوا
وأسمع نفس الرد..
مفيش..
ناقص..
وجايز مايجيش خالص

آخر الليل

عادى تلاقينى فرحان بغنى
كأنى عمرى ماعرفت حزن..
وعادى تلاقينى سكت خالص
علمنى قلبك شىء مهم
ماخدنهوش فى المدارس..
فى عز احتياجك للدفا
ما بتترميش فى أى حضن..
مش هو ده معنى الكرامة..
سايق عليكى العشق
ماتروحى منى بعيد..
ولما تخلص غنوتى
تقوليلى تانى.. عيد
سايق عليكى الشوق
ما تقولى خلاص..
زهقت..
كفاية كده..
مع السلامة..