الصفحة الأخيرة

مش باقى من كل الرايات

غير راية الحزن

بنمشى ف الشارع ساعات

ما بنلاقيش حد

ناخده بالحضن

راح فين الشاطر حسن

يا ست الحسن؟

إوعى تقوليلى خلاص

ماعدش ف الشارع

لا ناس..

ولا بيوت

جايز يغيب الضى

لكن عمر القمر ما يموت

بصى تانى..

فى الصفحة الأخيرة

فوق ع اليمين

عنوان..

غير كل العناوين

فى الممنوع..

مجدى مهنا..

لحد آخر نفس

وحيرتك أمل

وخوفك ونس

وحلمك وطن

وبنى آدمين

أما عن أحوالنا يامجدى

فأنت سيد العارفين

لسه يامجدى

ليل القاهرة بايخ

ولسه ع المنابر مشايخ

بتدعى بطولة العمر

لأصحاب الدار

وتقول آمين

ولسه حكم البراءة

مكافأة اللصوص والمجرمين

ولسه عايزين ناكل عيش

ونربى العيال

لكن لا العيال بتكبر يامجدى

ولا إحنا كمان عايشين

عارف يامجدى..

أجمل ما فى الألم

كشف لنا عن

ضعفك الجميل

ودمعتك القريبة

وابتسامتك الرقيقة

بدرى أوى يامجدى

عرفت الحقيقة

وعشت العمر كله

ف كام دقيقة

زى أى فارس نبيل

وده قدرك يا طيبة

ياعروسة النيل

كل ما يروح حد م الحبايب

ينطفى جواكى قنديل

يعوض عليكى ربنا

عوض الصابرين

الأستاذ راضى ـ ١

أيوه يا فندم ..

أنا راضى ..

راضى سعادتك راضى ..

موجود يا فندم ..

ورحمة أمى ..

ف سيرتك على طول ..

وحياة ولادى ..

عارف إنك مشغول ..

ومش فاضى ..

كان الله ف العون ..

إيه يا فندم ..

الوضع !!

مش حلو أوى ..

بس هو ده العادى ..

المترو !!

شغال يا فندم ..

واهو ساعات يعطل ..

عند سعد زغلول ..

وساعات يريّح ف المعادى ..

كل سنة ومعاليك طيب

انت العيد ده معانا !!

ولا لسه ف بلاد بره ..

طب والنبى ..

ابقى اغلط مرة ..

وعدى اشرب الشاى ..

لا إله إلا الله ..

باى باى

النيل بيتحرق

كأننا فى القطب الشمالى..

والدنيا مغرب على طول..

يرد حالك على حالى..

أقول أنا..

ولا انت تقول..

عارف..

إحنا أكتر شعب ف الدنيا اتطعم

ومع ذلك كلنا مرضى..

معقول الأمل اللى إتولد إمبارح

مات النهارده..

استمتع بالفوضى..

كسر إزاز المدرسة المتكسر..

ضلم شارع..

طول عمره كان بيحلم ينور..

واقطع طريق..

وقولى..

لو النيل إتحرق..

مين راح يطفى الحريق

الكلب ريكس

رأيك إيه يا مأمور الضرايب..

ف البيت اللى كان تمنه

فراق الحبايب..

معايا..

معاك..

طب تعالى ندخل بقى ف المفيد

الراجل ده عشان لقمة العيش

سافر بلاد بعيد.. بعيد

معايا..

معاك..

فات عليه كام هلال شوال

ووقفة ودخول مدارس وعيد..

معايا..

معاك..

يعنى اتغرب واتعذب

ورجع حط تحويشة العمر

ف حتة أرض

ف مجتمع عمرانى جديد..

معايا..

معاك.. 

ولإنها كانت صحرا

فالشارع كان عريض..

معايا..

معاك..

وعشان بيحب الجمال

وبيكره القبح

والإحساس البليد

معايا..

معاك..

زرع قدام البيت ورد بلدى

ولون الوجهة

واتحمل جشع تجار الأسمنت والحديد

معايا..

معاك..

ف الوقت اللى فيه قوانين

بتحميهم

وتسهيلات تديهم

وتطبطب عليهم

ولما تيجى تغرمهم

يادوب قيمة طابع بريد

ودلوقتى جاى تاخد منه

وسايب فلوسهم تزيد

معايا..

إيه ده إنت نمت

يارب لو قربت م البيت

الكلب ريكس يعضك..

مابتفرقش

عمليات جراحية..

تقدر بسهولة..

تغير ذمة.. وملة

وقلب.. ووش..

تكتب بقى..

ما تكتبش..

ما بتفرقش..

سوق بيلم غالى على رخيص

على واطى خسيس

م اللى ما بيساويش قرش..

بتكدب بقى.. ما بتكدبش

ما بتفرقش..

تبقى رقيق.. تبقى وسيم..

أو أعور ومكعور ولئيم..

تبقى بكرش.. من غير كرش

ما بتفرقش..

النور يقطع وانت بتحلق دقنك

ما تشفش تكمل.. عادى ما تكملش

واجه الدنيا بنص دقن وربع شنب

وما حدش راح ياخد باله

صدقنى..

بس انت دارى على شمعتك

واسكت.. وما تتكلمش

تبقى بتغنى تحت الدُش

وفجأة الميه مفيش

عيش.. عادى

أو نادى على مراتك

سمعت بقى.. ما سمعتش

ما بتفرقش..

واجه العالم واخرج بصابونك

ودور ع الفوطة بنفسك

وم الآخر.. تنشف جسمك.. تمشى مبلول

وما تنشفش..

ما بتفرقش..

تودى العيال المدرسة

تتعلم العيال.. ما تتعلمش

ما بتفرقش..

تروح المستشفى لا تلاقى طبيب ولا دوا..

اشكى أوجاعك لطوبة.. أو شجرة

أو للهوا..

أو لسواق الإسعاف النابطشى

وم الآخر.. تكشف.. ما تكشفش

ما بتفرقش..

المهم تموت على سريرك..

وما تتبهدلش..

ولازم يبقى عندك قناعة

إن الحزب الوطنى ما بيخسرش انتخابات

والأهلى ما بيتغلبش..

يعنى عملت بطاقة انتخابية

ولا أساساً مش مقتنع.. ما بتعملش

ما بتفرقش..

قمح مسوس بقى.. هوا متلوث

مركب بتخبط من غير ريس

نغرق..

نوصل بر أمان..

أو نصحى الصبح نلاقى النيل

بقى آخره.. أسوان..

لازم يبقى عندك إيمان

إن السلطة فى بلدنا إدمان

حاجة كده زى البيض العيون

لما يستقر فى الطاسة

ما بيتقلبش..

شوية حاجات

كل سنة وانت طيب

رمضان ع الأبواب..

هلت الروايح..

يا ترى ده عمر جاى

ولا ده عمر رايح..

المهم..

السنة دى هنصوم..

حسب البيان والمرسوم..

ولّا حد نظره حلو..

هيشوف الهلال..

عموماً..

أنا اشتريت أنبوبة بوتاجاز استبن..

وفوانيس صينى للعيال

ومراتى شاطرة مدبرة..

مخللة لمون وزتون..

وشايلة شوية حاجات ف شوال..

ودفعنا قسط المدرسة..

فاضل الكهرباء والصيانة والزبال..

شوف..

أول يومين نفطر ظفر..

ما هو كل سنة وانت طيب..

ده برضه احتفال..

ونكمل بعد كده بالفوازير..

والمسلسلات..

وأكيد الدورى العام شغال..

وتتقضى بإذن الله

وتبقى زى الفل

ويمشى الحال..

وأهو يوم نفطر عند حماتى

ويوم إحنا وحماتى

نفطر عند عمى كمال..

على فكرة بيتنا القديم

جاله قرار إزالة

تفتكر هايتزال..

يا عم ده جدك اللى بناه..

ولو كان خايب..

كان راح ف الزلزال..

إنما أنا عندى سؤال..

هو إحنا داخلين على رمضان..

ولا دى حرب وقتال..

ما هو لو العيش فى الفرن..

والزيت عند البقال..

والغاز مش زى ما سمعنا..

وتكتب واتقال..

والدروس الخصوصية جدعنة..

لله وللوطن..

واللحمة بريال..

كنا فكرنا ف حاجات أهم..

وعرفنا مصر راحت فين..

وارتاح البال..

لحسن بجد بجد..

غيابها طال..

كل سنة وانتم طيبين..

ما تاخدش فى بالك

الدنيا مش دايما طيبة..

وتعمل إيه

يا اللى انت دموعك قريبة..

ويا ترى دى ميزة

وللا ده عيب

تمد إيدك ف جيب القميص..

تطلع الورقة اللى فيها

اسم الدوا..

الرطوبة عالية

شربت كتير

لكن قلبى عمره ما ارتوى..

كام أجزخانة..

والإجابة

نفس الإجابة

مفيش

الدوا ده ناقص

يمكن ييجى كمان شهر

وجايز مايجيش خالص

اسأل قدام

انت عارف الدوا ده بكام

سألت ودورت ولفيت..

تعبت..

ولاقيتنى قريب من هنا

قلت أعدى

بس ياريتنى ما عديت..

شفتك..

حد شبه صاحبى

لكن مش هو

التانى كان أصغر منك بكتير..

وأجمل منك بكتير..

شربت قهوة وميه وعصير

بطعم الحيرة اللى ف شارع

القصر العينى

وتعب عسكرى واقف خدمة

ف عز حر أغسطس

ف قلب ميدان التحرير

ونزلت أدور من تانى

عن صاحبى اللى بجد..

واسأل ع الدوا

وأسمع نفس الرد..

مفيش..

ناقص..

وجايز مايجيش خالص

آخر الليل

عادى تلاقينى فرحان بغنى

كأنى عمرى ماعرفت حزن..

وعادى تلاقينى سكت خالص

علمنى قلبك شىء مهم

ماخدنهوش فى المدارس..

فى عز احتياجك للدفا

ما بتترميش فى أى حضن..

مش هو ده معنى الكرامة..

سايق عليكى العشق

ماتروحى منى بعيد..

ولما تخلص غنوتى

تقوليلى تانى.. عيد

سايق عليكى الشوق

ما تقولى خلاص..

زهقت..

كفاية كده..

مع السلامة..

طراطيف المناخير

شفت كتير..

لفيت الدنيا شرق وغرب

شمال ويمين..

ما سمعتش حد

بيقول لحد

بكبر وعنف..

وتكشيرة كبيرة على الوش..

ومن طراطيف المناخير..

انت عارف

انت بتتكلم مع مين..؟

غير هنا فى بلادنا

ولما سألت

عرفت إن الكلمة ف ثقافتنا..

وفى حضارتنا..

بقالها سنين..

وكل الكرسى ما يكبر.. تكبر

ونصدقهامش إحنا اللى عملنا فرعون

والفرعون أصبح ملايين

خايفين من ميت

مع إننا رايحين جايين

بنتفرج عليه وهو يا عينى

لا حول ولا قوة

نايم ف تابوت

ونبص على الموت

لكن نعمل روحنا مش شايفين

خير.. يا طير

ها تكون مين

مش برضه الباشا

بنى آدم زى بقيت البنى آدمين

مش طين..راجع تانى لطين

ها تكون مين

كداب فى زفة كدابين

تحط على عربيتك

علامة الميزان.. العدل

وتخالف كل القوانين

عارف

أنا كل ما أشوفك

أحلم بنص ف الدستور

يعالج عقد المصريين

التغيير.. التغيير

عشان نبطل نتكلم تانى

من طراطيف المناخير

مولود

مولود أنا

ماعرفش اعيش متكتف

والدنيا ياما وياما

واهي لسه بتحدف

أفرح

واغني

واعشق وانجرح

وبيصعب علي

لا ضحكتي مصنوعة

ولا دمعتي بإديا

واهو كلنا غرقانين

وكلنا بنأدف

قول يا عم

كل اللى عنده جرح يطلّعه 

وإياك يتخلف جريح

كل اللى فاته درس

كان لازم يتعلمه

كل اللى قفل قلبه ع اللى بيألمه

وسكت.. وراح 

يا كل الجراح 

آن الأوان نستريح

خلاص

صدقنى خلاص

مفيش حد فيهم أقوى من الريح

المهم

أنا عندى سؤال

سؤال واحد واضح صريح

مين اللى كان بيحمى الفساد فى مصر..؟

أمك

لأ

أمي

لأ

دول بركة الله يرحمهم

عاشوا وماتوا مصريين

أمال مين..؟

السؤال تانى

مين اللى كان بيحمى الفساد فى مصر..؟

عم سيد بتاع البصل

لأ

أم محمد بتاعة الجرجير؟

لأ

يبقى أبوهاشم بتاع الخروب

الخروب

يا عم

دول ناس غلابة طيبين

أمّال مين..؟

عارف

خايف أصحى الصبح واسمع الصرخة دى:

(الحرامى هرب.. الحرامى هرب.. الحرامى هرب)

المجد للشهداء

مصر حرة

والشارع فاضى.. هادى.. حزين

ويخلص الفيلم على كده

ونفضل نلم فى دموع الميدان سنين

السؤال تانى

مين...؟

مين اللى قفل الشباك

لحد دلوقتى

كل قصص الغرام اللى سمعتها

كانت حب من طرف واحد..

ولحد دلوقتى

كل ما الباب يخبط

أو يدق قلبى

اتخض أوى واتاخد..

ولحد دلوقتى

كل ما اتكعبل ف حزن

أقول أكيد دى عين حاسد..

ما عرفش ليه

لما قالتلى مد إيدك

خد شوية فرح

قلت لها.. لأ

مش واخد..

ولما اتخبط ف الحيطة

ونزفت..

قلت ف ستين داهية

شوية دم فاسد..

لكن لما شفت الجثث ع الشط

سألت نفسى

يا ترى مين اللى غرق السفينة

اللى هرب..

وللا اللى لسه قاعد..

إمبارح

لو تعرف أد إيه إنت جميل

جميل ياعبد الله جميل

سامحنى.. إمبارح كان دمى تقيل

الشارع مابقاش زى الأول

يابنى

ماطرح مانميل

ممكن نرتاح

بنفوت من زحمه لزحمه

ياعبد الله

و كأننا بنطارد أشباح

إبنى الصغير 

يالحته الحلوه اللى فى قلبى

يا أخر العنقود

سامحنى.. إمبارح راجع مهدود

زى عمود النور الخربان

شبه الصوره..اللى فى الصفحه الأولى 

فى الجورنان

و مفيش بين كل العناوين

عنوان واحد للأفراح

عارف

كل ما عينى تقع

على شهادة النجاح

أرجع أبص عليك..و عالشارع

أعرف إنها ورقه

زى بقيت الورق اللى إصفر

و مات فى مكانه و راح

هات حضن لبابا ياعبد الله

علشان أعرف أضحك من قلبى

و أقدر أبص فى وشك

صعب ياعبدالله

تبقى إنت الحته الطاهره اللى ف قلبى

و أغشك 

سامحنى

تحالف الفلفل مع القوطة والبتنجان

تشهد الساحة الآن

تحالف الفلفل مع القوطة والبتنجان

ضد الورد

بلد عاش الزعيم

وقال الزعيم

نقتل الأم عن عمد

ونحتفل بيوم اليتيم

راح زمان البيضة بمليم

وجايه أيام نترحم على كيلو اللحمة أبوسبعين جنيه

بلد من غير ليه

بلد هيه.. هيه

العروسة جت.. جت

بلد نزل يعوم عريان

وبعت رسالة للحرامى

إنه سايب هدومه ع الشط

والنتيجة إنه ماشى بلبوص

وياريتها جت ع الفلوس

بلد بياكل بعضه

بلد عواد اللى باع أرضه

وبيشحت شقة ف مساكن الزلزال

بلد ياكل لحمك الحى

ويبكى يوم وفاتك

ويغنيلك يوم ماتش الاعتزال

بلد

لا فرحان

ولا حزين

ضد مين..

مع مين..

رئيس نادى للكورة بالانتخاب

وشيخ الأزهر بالتعيين..

والكنيسة لا تخلط السياسة بالدين

لكنها تبارك التعديلات الدستورية

بلد أفرط فى أكل الملوخية

صدق كذبة الحرية

نام وهو مطمن إن اسمه حسن

صحى لقى نفسه فتحية

شاى بدون سكر

مش إنت يا صاحبى اللى قلت 

العشق..

زى الرزق..

زى الموت..

فى إيد رب العباد..

مش إنت اللى علمتنا وقت الشدة

إزاى نكون شداد..

وقد ما كانت الأيام قاسية عليك

قد ما حنيت ع الولاد..

حطيت تحويشة العمر فى الصحرا

وبصبر.. وأمل.. وعناد

قلتلى والله لأزرعها سنابل قمح

أنا فلاح.. ابن فلاح

تدوس الدنيا على الجرح

تتعب الدنيا..

لكن أنا.. أرتاح

قوم يا صاحبى

وإسند على قلبى

يمكن الألم اللى فيك

يشفى أوجاعه..

أيامنا الحلوة زى ما هى

مالنا إحنا بقى ومال اللى باعوا..

عارف..

أنا عمرى ما زورتك

ورجعت بقلبى فاضى

حتى المرة دى.. كريم

كل شىء مقدور عليه يا صاحبى

ما دام قلبك سليم..

ها استناك..

ونس يدق الباب

أسألك.. تشرب إيه

وأسمع نفس الجواب

شاى خفيف..

بدون سكر..

رد بلدى

الدم الطاهر

يروى الأرض

ف عز الدنيا ما بتموت م البرد

بيصبح حضن

يرجع قلبى اللى مسافر

من حزن لحزن

الدم الطاهر

يزرع قمح وفرح وقطن

يبقى كرامة

ووطن غير كل الأوطان

الدم الطاهر

بيرجع فينا الإنسان

ابعد إيدك عن قلمى

أنا عايز بلدى بدون أحزان

من غير تزوير

من غير سرطان

عارف

أنا عمرى ما سمعت.. تحيا الثورة غير فى السيما

أنا عمرى ما سمعت عن بلدى

غير ف النكتة البايخة

اللى بتقتل فينا الفرحة بمليون تكشيرة

ابعد إيدك عن قلمى

أنا عايز بلدي

بدون حيرة

وجواز سفرى اللى يشرف

أكبر تأشيرة

أنا عايز بلدى بدون دكاكين

بتبيع فى كلام

بلدى اللى اتولدت

مع أجمل تعظيم سلام

للدم الطاهر