طراطيف المناخير

شفت كتير..

لفيت الدنيا شرق وغرب

شمال ويمين..

ما سمعتش حد

بيقول لحد

بكبر وعنف..

وتكشيرة كبيرة على الوش..

ومن طراطيف المناخير..

انت عارف

انت بتتكلم مع مين..؟

غير هنا فى بلادنا

ولما سألت

عرفت إن الكلمة ف ثقافتنا..

وفى حضارتنا..

بقالها سنين..

وكل الكرسى ما يكبر.. تكبر

ونصدقهامش إحنا اللى عملنا فرعون

والفرعون أصبح ملايين

خايفين من ميت

مع إننا رايحين جايين

بنتفرج عليه وهو يا عينى

لا حول ولا قوة

نايم ف تابوت

ونبص على الموت

لكن نعمل روحنا مش شايفين

خير.. يا طير

ها تكون مين

مش برضه الباشا

بنى آدم زى بقيت البنى آدمين

مش طين..راجع تانى لطين

ها تكون مين

كداب فى زفة كدابين

تحط على عربيتك

علامة الميزان.. العدل

وتخالف كل القوانين

عارف

أنا كل ما أشوفك

أحلم بنص ف الدستور

يعالج عقد المصريين

التغيير.. التغيير

عشان نبطل نتكلم تانى

من طراطيف المناخير

مولود

مولود أنا

ماعرفش اعيش متكتف

والدنيا ياما وياما

واهي لسه بتحدف

أفرح

واغني

واعشق وانجرح

وبيصعب علي

لا ضحكتي مصنوعة

ولا دمعتي بإديا

واهو كلنا غرقانين

وكلنا بنأدف

قول يا عم

كل اللى عنده جرح يطلّعه 

وإياك يتخلف جريح

كل اللى فاته درس

كان لازم يتعلمه

كل اللى قفل قلبه ع اللى بيألمه

وسكت.. وراح 

يا كل الجراح 

آن الأوان نستريح

خلاص

صدقنى خلاص

مفيش حد فيهم أقوى من الريح

المهم

أنا عندى سؤال

سؤال واحد واضح صريح

مين اللى كان بيحمى الفساد فى مصر..؟

أمك

لأ

أمي

لأ

دول بركة الله يرحمهم

عاشوا وماتوا مصريين

أمال مين..؟

السؤال تانى

مين اللى كان بيحمى الفساد فى مصر..؟

عم سيد بتاع البصل

لأ

أم محمد بتاعة الجرجير؟

لأ

يبقى أبوهاشم بتاع الخروب

الخروب

يا عم

دول ناس غلابة طيبين

أمّال مين..؟

عارف

خايف أصحى الصبح واسمع الصرخة دى:

(الحرامى هرب.. الحرامى هرب.. الحرامى هرب)

المجد للشهداء

مصر حرة

والشارع فاضى.. هادى.. حزين

ويخلص الفيلم على كده

ونفضل نلم فى دموع الميدان سنين

السؤال تانى

مين...؟

مين اللى قفل الشباك

لحد دلوقتى

كل قصص الغرام اللى سمعتها

كانت حب من طرف واحد..

ولحد دلوقتى

كل ما الباب يخبط

أو يدق قلبى

اتخض أوى واتاخد..

ولحد دلوقتى

كل ما اتكعبل ف حزن

أقول أكيد دى عين حاسد..

ما عرفش ليه

لما قالتلى مد إيدك

خد شوية فرح

قلت لها.. لأ

مش واخد..

ولما اتخبط ف الحيطة

ونزفت..

قلت ف ستين داهية

شوية دم فاسد..

لكن لما شفت الجثث ع الشط

سألت نفسى

يا ترى مين اللى غرق السفينة

اللى هرب..

وللا اللى لسه قاعد..

إمبارح

لو تعرف أد إيه إنت جميل

جميل ياعبد الله جميل

سامحنى.. إمبارح كان دمى تقيل

الشارع مابقاش زى الأول

يابنى

ماطرح مانميل

ممكن نرتاح

بنفوت من زحمه لزحمه

ياعبد الله

و كأننا بنطارد أشباح

إبنى الصغير 

يالحته الحلوه اللى فى قلبى

يا أخر العنقود

سامحنى.. إمبارح راجع مهدود

زى عمود النور الخربان

شبه الصوره..اللى فى الصفحه الأولى 

فى الجورنان

و مفيش بين كل العناوين

عنوان واحد للأفراح

عارف

كل ما عينى تقع

على شهادة النجاح

أرجع أبص عليك..و عالشارع

أعرف إنها ورقه

زى بقيت الورق اللى إصفر

و مات فى مكانه و راح

هات حضن لبابا ياعبد الله

علشان أعرف أضحك من قلبى

و أقدر أبص فى وشك

صعب ياعبدالله

تبقى إنت الحته الطاهره اللى ف قلبى

و أغشك 

سامحنى

تحالف الفلفل مع القوطة والبتنجان

تشهد الساحة الآن

تحالف الفلفل مع القوطة والبتنجان

ضد الورد

بلد عاش الزعيم

وقال الزعيم

نقتل الأم عن عمد

ونحتفل بيوم اليتيم

راح زمان البيضة بمليم

وجايه أيام نترحم على كيلو اللحمة أبوسبعين جنيه

بلد من غير ليه

بلد هيه.. هيه

العروسة جت.. جت

بلد نزل يعوم عريان

وبعت رسالة للحرامى

إنه سايب هدومه ع الشط

والنتيجة إنه ماشى بلبوص

وياريتها جت ع الفلوس

بلد بياكل بعضه

بلد عواد اللى باع أرضه

وبيشحت شقة ف مساكن الزلزال

بلد ياكل لحمك الحى

ويبكى يوم وفاتك

ويغنيلك يوم ماتش الاعتزال

بلد

لا فرحان

ولا حزين

ضد مين..

مع مين..

رئيس نادى للكورة بالانتخاب

وشيخ الأزهر بالتعيين..

والكنيسة لا تخلط السياسة بالدين

لكنها تبارك التعديلات الدستورية

بلد أفرط فى أكل الملوخية

صدق كذبة الحرية

نام وهو مطمن إن اسمه حسن

صحى لقى نفسه فتحية

شاى بدون سكر

مش إنت يا صاحبى اللى قلت 

العشق..

زى الرزق..

زى الموت..

فى إيد رب العباد..

مش إنت اللى علمتنا وقت الشدة

إزاى نكون شداد..

وقد ما كانت الأيام قاسية عليك

قد ما حنيت ع الولاد..

حطيت تحويشة العمر فى الصحرا

وبصبر.. وأمل.. وعناد

قلتلى والله لأزرعها سنابل قمح

أنا فلاح.. ابن فلاح

تدوس الدنيا على الجرح

تتعب الدنيا..

لكن أنا.. أرتاح

قوم يا صاحبى

وإسند على قلبى

يمكن الألم اللى فيك

يشفى أوجاعه..

أيامنا الحلوة زى ما هى

مالنا إحنا بقى ومال اللى باعوا..

عارف..

أنا عمرى ما زورتك

ورجعت بقلبى فاضى

حتى المرة دى.. كريم

كل شىء مقدور عليه يا صاحبى

ما دام قلبك سليم..

ها استناك..

ونس يدق الباب

أسألك.. تشرب إيه

وأسمع نفس الجواب

شاى خفيف..

بدون سكر..

رد بلدى

الدم الطاهر

يروى الأرض

ف عز الدنيا ما بتموت م البرد

بيصبح حضن

يرجع قلبى اللى مسافر

من حزن لحزن

الدم الطاهر

يزرع قمح وفرح وقطن

يبقى كرامة

ووطن غير كل الأوطان

الدم الطاهر

بيرجع فينا الإنسان

ابعد إيدك عن قلمى

أنا عايز بلدى بدون أحزان

من غير تزوير

من غير سرطان

عارف

أنا عمرى ما سمعت.. تحيا الثورة غير فى السيما

أنا عمرى ما سمعت عن بلدى

غير ف النكتة البايخة

اللى بتقتل فينا الفرحة بمليون تكشيرة

ابعد إيدك عن قلمى

أنا عايز بلدي

بدون حيرة

وجواز سفرى اللى يشرف

أكبر تأشيرة

أنا عايز بلدى بدون دكاكين

بتبيع فى كلام

بلدى اللى اتولدت

مع أجمل تعظيم سلام

للدم الطاهر

شقاوة خريف

أنا كنت ضعيف فى النصوص
لكن فى التاريخ فلتة..
اتجوزت مرتين
ونفسى فى التالتة..
مش فراغة عين
ولا دناوة..
لكنى حاسس إنى مخلوق بألف قلب
وكلهم عاملين شقاوة..
أما الدنيا دى حلوة حلاوة
يخرب بيت كده..
تمد إيدك تساعد حد
يرد عليك بنظرة رضا..
ما تعرفش ساعتها
مين اللى كان محتاج للتانى..
مش قلت لك
اللى بنى البلد دى
كان ف الأصل حلوانى..
قولى لى يا حلوة
مين دلك على قلبى
وإيه اللى رمانى
وخلانى أبوح
وأهرب من كل الزيف..
يا ترى دى شقاوة خريف
ولا بداية شتا
ونهاية صيف..
ولا أنا الى كل ما أقرب من روحى
بتبعد عنى أحزانى..

آخر يوم فى الإجازة

اصحى بدرى..
وامسك ف النهار
وأخاف يفوت..
وارمى قلبى..
ف حضن شجرة توت..
أشم ريحة العيال
وهم رايحين المدرسة
ترد فىَّ الروح
مفيش يا حبيبتى
عاشق بيموت غريب..
أشرب الشاى بالحليب..
وأسيب روحى
تلم اللى باقى م النهار..
تخطفنى نظرة
من عيون ابنى الصغير
أنسى فين جواز السفر
وفين التذكرة..
ومنين بيروحوا المطار..
هاتلبس إيه وانت مسافر..؟
أى حاجة.. أى حاجة
صالة كام يا أستاذ..؟
أقرب أكتر م الشباك
وافتح الإزاز..
وابص عالشوارع..
ماعرفش إن كنت رايح
ولا راجع..
أطلبك عشان أطمن عليك
يرد صوت بلاستيك
هذا الرقم غير موجود..
أحس بنفس المرارة
واحنا بنعدى الحدود..
وأتوه..
كل مرة بسافر مع نفس الحاجات
ونفس الوجوه..
حتى صوت المضيفة
ونفس السؤال
انت.... أيوه انت
لحمة.. ولا فراخ؟
أى حاجة..
أى حاجة..