على فين يا نيل..؟

كبرت ولسه خواف..
تجرى..
تشد اللحاف..
ترتعش..
تصرخ..
الحقينى يامه..
يا عم اصحى بقى..
ده مد بالواو
إنما دى ضمة..
لما يتجدد قانون الطوارئ
لأجل غير مسمى..
وبعد بلاغ لمباحث الأموال العامة..
يطلع السارق
وعلى صدره وسام..
وف انتظاره منصب رفيع..
منين يا صاحبى
ها يجى الربيع..
وسرقة المال العام..
بقت شرف..
وإذا كان ده هو اللى اتعرف..
يا ترى المستخبى
شكله إيه..؟
وبتسألنى على فين
بتبعد ليه..؟
يا عم روح..
كفاية قرف..
كفاية قرف..