بحب البيض..
زى كل حبايبنا الشطار..
والمسلوق تحديدا
لأنه بيدينى حرية الاختيار..
يا أعيش الحالة كلها على بعضها
يا إما أفصل البياض
عن الصفار..
بحب البيض
لأنه بسيط
مش محتاج فلسفة
دول شوية ميه فى كوز
ودقيقتين ع النار..
وبحب البيض
عشان واضح
صريح..
ساعة ما بيفسد
بيقولك ف وشك أنا فاسد
لا يغشك
ولا يدوّر على أعذار..
صحيح فى شم النسيم بيتلون
لكن بيفضل بيض.. بيض
لا يقول أنا تفاح
ولا مشمش
ولا خيار..
والبيض برىء من ظاهرة الانتفاخ
وساعة ما بتمرض الفراخ
بيعلن للعالم كله
إنه غير مسؤول
عن كل أنواع الفشل
وبرىء من جشع التجار..
لكن من عيوبه
إنه سهل الكسر
سريع الانهيار..
لكن رغم ضعفه..
بيلعب دور مهم ف المعركة
ويقدر يبعد عنك أعدائك
على الأقل..
مسافة عشر أمتار..
يا ريت نتعلم م البيض
ثقافة الاعتراف بالخطأ
علنى وفى عز النهار.
على سلامة ١٧/ ٣/ ٢٠١٠
ليست هناك تعليقات:
إرسال تعليق