الجمعة، 12 مارس 2010

ثقافة

فيه ناس لما تضايق
تملا البانيو وشوية بخور
وشمع ومزيكا وأغاني
أو تروح تحكي وتاخد وتدي
مع طبيب نفساني
أو تطلع شرم الشيخ تاني
ودي ثقافة..

وفيه ناس لما تتخنق
ترجع تقلب ف اللي فات
وتجيب الصور والذكريات
وتاخد جوافة وبلح أمهات
وتروح تزور الميتين ف القرافة
ودي ثقافة..

وفيه ناس تلم العيال
وربع لب ونص سوداني
وفيلم قديم لإسماعيل ياسين
أو نجيب الريحاني
أو تعدي ع الحلواني
وكيلو مشكل وتكتر الكنافة
ودي برضه ثقافة

لكن الكل مجروح..
ونفسه يبوح..
بس مش عارف..

ليست هناك تعليقات:

إرسال تعليق