يا شيخ اسكت

قلتلك اسمع كلامي...
ده نصاب...
وده حرامي...
وده قاتل...
وده لئيم...

قلتلك ممعاناش...
غير ستة جنيه...
وما عملناش...
غير تلات كباري...
من غير لا صحة ولا تعليم...

وقلتلك ده ضلالي...
ف عز الضهر...
ياكل كال اليتيم...

قلتلي انت مش كويس؟
وعيالك تمام وف السليم؟
يا عم سامح..
ده المسامح كريم..
واحمد ربنا..

يا شيخ اسكت..

يا عم..
مانا باحمد ربنا..
احنا بس عايزين...
حد يقولنا..
الدور حاييجي علينا ونفرح؟
واللا صالة الأفراح...
كاملة العدد..
ومافيهاش مطرح؟

يا شيخ اسكت..

دانا من كتر ما كتبت وجع...
اتهيألي إن الفرح عيب...
أو ممنوع!

عارف لو نسيت...
وكتبت قصيدة حب؟
أحس إني عملت عمل..
وأقول يا فضيحتي...

ولو دق الباب...
أجري واخبي قلبي...
أحسن يكون بوليس الآداب...
ويلفوني ف ملاية..
ويعملولي قضية زنا..
يا عم مانا باحمد ربنا..
باقولك مافيش جوانا شيء...
ولا عندنا...

يا شيخ اسكت...

دانا باقول لمراتي...
تعالي نرجع لايام زمان...
قالتلي ياخويا العيال أولى...
فاضل علينا...
من مصاريف المدرسة قسطين...
شوفت احنا بقينا فين؟!

يا شيخ اسكت

وفضلت اقول يا شيخ اسكت...
يا شيخ اسكت...
أتاريني باكلم روحي...
ولا فيه شيخ...
ولا قسيس..
وتقريبا لنا انفعلت...
وقع الرز م الكيس..
واتبعترت ع الأرض كل الحاجات...
ولِم بقى يا معلم...

عاجبك كدة؟
يا شيخ اسكت!