الخميس، 11 مارس 2010

طبق اليوم

ربع كوباية مية م الحنفية..
ده لو تيسر..
نص كيلو بصل..
ومش شرط يتقشر..
وسنة ملح وفلفل أسمر..
ولو مفيش أسمر..
أي لون يعجبك..
يا عم إكتب ورايا..
إحنا من أولها هانكشر..
شعار البرنامج إيه..
الطبيخ نفس..
مش أكتر..
وتشهد علينا الحلل والبوابير..
إننا طبخنا لحم الكلاب..
والحمير..
لا حد مات..
ولا حد قال آي..
ولا حد وقع وإتكسر..
والجدع بقي اللي يعرف ليه..
أو يقدر يفسر..
معادنا الأسبوع الجاي..
مع حلقة جديدة م البرنامج..
لو كان لنا عمر..
وفينا روح..
نضحك..
ونبكي..
ونهزر..

ليست هناك تعليقات:

إرسال تعليق