بيض بالبسطرمة

حبيتها أيام ما كان..
شارع القصر العيني اتجاهين..
كان أياميها ممكن جدًا..
نتعشي بيض بالبسطرمة..
ونشرب شاي بنعناع ف الحسين..
كان لسه رمسيس ف الميدان..
والدنيا أمان ولذيذة..
وكان فيه أهرامات ف الجيزة..
اللي بعد كده اسم الله عليك..
اتبني مطرحها سيرك أبوعزيزة..
ماكنش لسه مترو الأنفاق..
وكنا بنرفض..
أي معني للفراق..
وكان فيه حب من نظرة عين..
تصدق بقي..
كانت البيوت فيها بركة..
رغم المساحات الضيقة..
وكان فيه شوية حاجات جميلة..
ما تعرفش راحت فين..