ماخدتش ولا اديت

لما وشى بقى اصفر لمونة
ماخدتش ولا اديت
ولما اترميت ف قلب الطاحونة
ماخدتش ولا اديت
ولما شميت ريحة شياط
ووقعت فوق دماغى كل الحاجات
ماخدتش ولا اديت
ولما قالولى من ايه الدم اللى ف وشك
فين روحك
حاسب قلبك بيغشك
ماخدتش ولا اديت
ولما حسيت بألم ف راسى
ولقيتنى ناسى
اسم ابنى الوحيد
ولما شوفتك رايحة لحتة بعيد
ماخدتش ولا اديت
لحد مالقيتنى مربط ف جبس وشاش
وشايف كل شىء طشاش
وحواليا ناس كتير معرفهاش
بيقولولى مين اللى رماك م القطر
ياصابر......