الخميس، 11 مارس 2010

متر في متر

اوضه كام متر في متر
بجهاز تكييف وسرير ودولاب
والباب بيطل علي الباب
شباك مفتوح
علي ضي القمر المجروح
وستاير بتخاصم النسمه
والنسمه تملي مخصماها
الحر شديد
لكن بردان
مرعوش الصوت
والخوف انسان
بيشد دراع اليوم
واليوم قلقان علي بكره
وبكره الحلم المنقوش
ف عيون ووشوش بتبوش
من اول دمعه
الحر شديد
والغربه عذاب
وانا شيلك ورده ف قلب كتاب
في اوضه كام متر في متر
بجهاز تكييف
وسرير
ودولاب

ليست هناك تعليقات:

إرسال تعليق