إلهى تنشك يا بعيد

سبع عجايب يا زمان..
وآدى كمان أعجوبة..
مين لبسك عريان..
فى عز برد طوبة..
تصدرى الغاز ببلاش
وتدورى على أنبوبة..
وتنورى الخرابات..
وتباتى مخروبة..
والدنيا تجرى.. وتجرى
وإنتى واقفة ف مكانك بتبكى
وبتحلمى بزقة..
يا زوبة..
الله يرحمك يا خالتى أم سعيد..
كانت تكشف راسها للسما
وتدعى ع الخضرى
روح..
إلهى تنشك فى قلبك يا بعيد..
عشان قبل ما يوزن
ما كانش بيمسح كفة الميزان..
يا ترى
لو كانت لسه عايشة
وشافت وطن بحاله بيتسرق
روح..
وطعم..
وعنوان..
كانت م الحسرة ماتت
ولا كانت قالت مع الكروان..
الملك لك .. لك
لك وحدك..
يا صاحب الملك..