بحب البرد

بحب البرد ..
ويا سلام لو حد هرب م الدوشة
وراح وجابلى ورد ..
وأموت م الفرحة والدهشة
لو كتبت قصيدة
وقولتلى حلوة
قولها تانى
أتنطط زى العيال الصغيرين
وأقولك احلف
والله العظيم
بتتكلم جد ..
يمكن عشان أيام الفرح قليلة
سهل تتعد ..
عارف
رغم إن المخازن
كل يوم بتتحرق
ومفيش حساب ولا جرد ..
ورغم وجود السيرك
والأراجوز
والتلات ورقات
وجوز وفرد ..
عمرى ما اتمنيت أكون أمير
أو ولى عهد ..
لكنى بحلم بوطن
مفيهوش ولا حارة سد ..
وطن بيفرح بحاجة
غير وصول المنتخب كاس العالم
وحزنه أنبل
م الدموع البلاستك
وعمليات التجميل
والشفط والشد ..
عارف
رغم إنها
بتقع ..
بتغرق ..
بتتنيل بستين نيلة
لكن جميلة
وعمرها ما هاتتهد
عشان كده
أنا لسه بحب حاجة
ولسه ف قلبى حد ..